Қазақстан халқы Ассамблеясы

20 Сәуір, 2021

48

Жыр алыбының шығармашылығына арналған байқау

Солтүстік Қазақстан облысындағы Достық үйінде Жамбыл Жабаевтың 175 жылдығына арналған көркемсөз оқу шеберлерінің конкурсы өтті.

Сайысқа аудандық кезеңдерді еңсерген 12 жеңімпаз қатысты. Қатысушылардың жасы 18-бен 29 жас аралығында болды.

Сайысқа қатысушылар Жамбыл Жабаевтың лирикалық өлеңдерін жатқа оқыды. Келесі кезекте ақынның поэмаларынан үзінділер оқыды. Үшінші кезеңде үміткерлер әділ қазылардың назарына Жамбыл Жабаевтың құрметіне шығарған өз туындыларын ұсынды.


Ақынның шығармалары арқылы қатысушылар ұлы Жамбыл жазған жалпы адамзаттық құндылықтар – патриотизм, адамгершілік және әлемге деген сүйіспеншілікті көрсетуге тырысты.

Әділ қазылар алқасы құрамында Өнер колледжінің оқытушылары мен С.Мұқанов атындағы қазақ драма театрының өкілдері, СҚО білім басқармасының және Тілдерді оқыту орталығының қызметкерлері болды.

Шал ақын ауданынан келген Данагүл Аюпова үздік атанып, жеңіске жетті. Екінші орынды Мамлют ауданының атынан қатысқан Әбілмәжінова Маржан иеленді. Үшінші орынға Айыртау ауданынан Нашкенов Айдын ие болды.


Сонымен қатар қазылар алқасы бірқатар номинациялар бойынша бірнеше қатысушыларды марапаттады. «Жыр алыбы» номинациясында - Шерниязова Жайнаның (Аққайың ауданы) өнері, «Поэзия шебері» номинациясында - Майрашева Әлияның (Ғ. Мүсірепов атындағы аудан) шығармашылық тәсілі және «Шығармашыл тұлға» номинациясында - Байғанова Замзагүлдің (Уәлиханов ауданы) шеберлігі атап өтілді.

Қазылар алқасы қатысушылардың шығармашылық көзқарасын, ақынның шығармашылығына деген құрметін атап өтіп, жастарға жаңа жеңістер тіледі.

Кейін қарай