Қарағанды қаласы Достық үйінде Қазақстан халқы Ассамблеясының «Мың бала» республикалық мәдени-ағартушылық жобасының облыстық кезеңін қорытындылауға арналған мерекелік кеш өтті.

Жобаның мақсаты - озық тіл үйрету құралдарының көмегімен этностардың балаларына мемлекеттік тілді үйрету, қоғамдық келісім мен қазақстандық патриотизмді нығайту факторы ретінде мемлекеттік тілдің мәртебесін көтеру, мемлекеттік тілді оқытудың сапасын арттыру, тіл, мәдениет, салт-дәстүр мен әдет-ғұрыптар арқылы балалардың бойында толеранттылық қарым-қатынас әдебін қалыптастыру.

Байқауға облыстың аудан, қалаларынан этнос өкілдері, студенттер мен мектеп оқушылары, мектепке дейігі мекемелердің тәрбиеленушілері қатысып, бақтарын сынады. Жобаның Қарағанды облыстық кезеңінде «Қазақ тілін оқыту жөніндегі «Тіл мектебі» авторлық бағдарламалар» номинациясы бойынша Абай ауданының Абай атындағы ТМ РО мұғалімі Мадина Сапарқызы Түсіпбаева , «Өнер алды – қызыл тіл» номинациясы бойынша Қарағанды қаласындағы «Шәкәрім атындағы гимназия» КММ 8-сынып оқушысы Виктор Каверин, «Өнерлі өрге жүзер» музыкалық байқауы номинациясы бойынша Теміртау қаласындағы «SOS Теміртау балалар ауылы» ЖББМ 9 «б» сыныбының оқушысы Лида Арешина жеңімпаз атанды.

Салтанатты кеште жеңімпаздар марапатталып, ақшалай сыйлықтар мен дипломдар табысталды. Сондай-ақ, халықаралық, республикалық және облыстық байқаулардың лауреаттарының қатысуымен концерт беріліп, ЮНЕСКО аясында тойланып жатқан А.Байтұрсынұлының 150 жылдық мерейтойына арналған Н.В. Гоголь атындағы Қарағанды облыстық әмбебап ғылыми кітапханасының кітап көрмесі өткізілді. Аталған шараны этно-мәдени бірлестіктердің, Қарағанды облысы ҚХА құрылымдарының өкілдері және белгілі спорт пен қоғам қайраткерлері, БАҚ өкілдері, ардагерлер, мемлекеттік тілді жетік меңгерген өзге ұлт өкілдері, мемлекеттік тілді оқыту бойынша орталық басшысының орынбасарлары мен оқытушылар, әдіскерлер, тәрбиешілер, оқушылар мен студенттер, Қарағанды облысы әкімінің «Тіл жанашыры» сыйлығының лауреаттары тамашалады.

Кейін қарай