Ағымдағы жылдың тамызында «Мерейлі отбасы-2022» ұлттық байқауы облыстық турының жеңімпаздарын марапаттау рәсімі өтті.

Отбасы құндылығын насихаттап, жанұя татулығы мен бірлігін нығайта түсуді мақсат еткен байқауға облыс бойынша 243 отбасы қатысқан. Оның 22-сі облыстық деңгейге жолдама алса, 4 отбасы байқау жеңімпазы атанды.

Байқау жеңімпаздарын облыс әкімінің орынбасары Үйсімбаев Еркін Құлымбайұлы марапаттады.

Нәтиже бойынша «Мерейлі отбасы-2022» ұлттық байқауының ІІІ орнын Қордай ауданына келген Вансинвин отбасы иеленді. Вансинвин отбасы этносаралық келісімді нығайтуға үлес қосып жүрген, «Мектепке жол» акциясы аясында оқушыларды мектеп формасымен қамтасыз еткен үлгілі жанұя. Қазір Вансинвин отбасы 3 ұл тәрбиелеп, олардан 10 немере, 8 шөбере көріп отыр.

Байқауда екінші орынды Т.Рысқұлов ауданынан Далибаевтар отбасы алды. Аталған отбасы 1 ұл 6 қыз тәрбиелеп олардан 13 немере көрген, қайырымдылықпен айналысатын үлгілі жанұя.

Байқаудың бірінші орнын Байзақ ауданынан 9 ұл, 6 қыз дүниеге әкеліп олардан 36 немере 40 шөбере өсіріп отырған Мамырбаевтар отбасы иеленді.

Байқаудың бас бәйгесін, 2022 жылдың «Мерейлі отбасы»атауын Тараз қаласынан Ержановтар отбасы алды. Өздерінің балаларынан бөлек 12 баланы бауырына басып, қанаттандырған отбасы «Алтын алқа», Ұлттық қоғамдық «Алтын Жүрек» сыйлығының және «Ерен еңбегі үшін» медалінің иегерлері. Ержановтар отбасында 56 немере 8 шөбере өсіп келеді.

Жеңімпаздарға ақшалай сертификаттар табысталды.

Жамбыл облысы әкімдігі ІСБ «Қоғамдық келісім» КММ

Баспасөз қызметі орталығы

Кейін қарай