Қызылорда қаласындағы Достық үйіне «Мәдени мұра» халықаралық жобасы аясында Түркия Республикасының Жастар және спорт министрлігінің делегациясы келді.

Қонақтарды облыстық «Қоғамдық келісім» КММ басшылығы өкілдері және өңірлік «Ассамблея жастары» ұйымының төрағасы Елена Пак құрметпен қарсы алды.

Достық үйін аралап, оның қызметімен танысқан делегацияға «Қоғамдық келісім» КММ директорының орынбасарлары Дәулет Омаров және Фархат Әбдібағдатұлы Сыр өңірінде этносаралық татулық пен қоғамдық келісімді нығайту бағытында қолға алынған істер туралы баяндады. Және де мекеменің этномәдени бірлестіктер жұмысын үйлестірудегі оң нәтижелеріне тоқталып, Достық үйінің бейбітшілік пен келісімді нығайтудағы жарқын бастамалары мен көпсалалы орталықтардың шаңырағына айналғанын атап өтті. Ал «Ассамблея жастары» ұйымының төрағасы Елена Пак жастардың жарқын жобаларымен таныстырды.

Делегация құрамындағы Анталия қаласының жастар орталығының белсенді, ерікті жастары мен «Ассамблея жастары» жастар қанаты мүшелері әңгіме-дүкен құрып, өзара тәжірибе алмасты.

Басқосу соңында қонақтарға ғылыми және тарихи кітаптар сыйға тартылды.

Кейін қарай